قربانی

سعادت ہے کہ اس مہنگائی میں بھی
خدا نے جرأتِ ایمانی دی ہے
مگر میں نے کیا قربان بکرا
یا بکرے نے مری قربانی دی ہے

سہولت

نہ پانی ہے نہ دانہ ہے ، گرانی کا زمانہ ہے
بھلا اِس دور میں ہمت کسے مہماں نوازی کی
تصور میں چلے آؤ ، نہ ہو تکلیف دونوں کو
تمہیں ویگن میں رُلنے کی مجھے مہماں نوازی کی

ڈرون حملے

مخنثانہ مساعی ہیں حکمرانوں کی
جواب رکھتے نہیں ہیں ڈرون حملوں کا
ستم ظریف ہے لاحول سے نہیں ٹلتا
جنابِ سام کو ٹھہرا جنون حملوں کا

حفظِ ماتقدم

داخلہ ایڈوانس کروا لیں
آج کر لیں جو کل کو فیٹ میں ہے
فکرِ تعلیم میں نہ رسوا ہو
بچہ / بچی جو ماں کے پیٹ میں ہے

بشرطیکہ

تر نوالہ دکھائی دیتے ہیں
تا کوئی لے کے پین چھڑ جائے
ہم تو کرکٹ بھی جیت سکتے ہیں
جب کوئی بیٹسمین چھڑ جائے

ایسی کی تیسی

ظفر انصاف پرور ہے تو کیا ہے
ترے اوصاف کی ایسی کی تیسی
مری گچی پکڑنا چاہتا ہے
تو پھر انصاف کی ایسی کی تیسی

سیاسی ڈپلومیسی

لُوٹ لیجے ڈپلومیسی کے مزے
عالمِ بے خانماں برباد میں
گالیاں دے لیجئے دل کھول کر
معذرت کر لیجئے گا بعد میں

عدلیہ سے

چھپکلی پر ہاتھ ڈالا ہے بڑا اچھا کیا
دیکھنا ہے کیا مگرمچھ کو پکڑ پائیں گے آپ
چور کو پکڑا ہے لیکن بات تب بن پائے گی
چور کی ماں کو بھی کوئی ہاتھ دکھلائیں گے آپ

قومی کرکٹ ٹیم سے

رہے یاد کرکٹ کے میدان میں
حدیں انبساط و طمع کی ہیں طے
یہ نقطۂ باریک مت بھولنا
جوئے اور کرکٹ میں کچھ فرق ہے

بیچارہ امریکہ

ساری دنیا میں ہو رہی ہے ظفر
کس لئے ہائے ہائے امریکہ
ایٹمی اسلحہ بناتا ہے
تاکہ مکھیاں اُڑائے امریکہ

کیوں نہیں

جب یہ ملک و قوم اُن کے باپ کی جاگیر ہے
ایک اُن کے ہاتھ سے بجتی ہے تالی کیوں نہیں
حکمرانوں میں چمونے ہیں اسی احساس کے
عدلیہ اب تک ہمارے گھر کی لونڈی کیوں نہیں

نیب کا چئرمین

کالے کرتوتوں پر رہے پردہ
حکمرانوں کا پورا سپنا ہو
سارے کیسوں سے جان چھٹ جائے
نیب کا چئرمین اپنا ہو

مفت کا پنگا

بدبختی ہے یا مفت کے پنگوں کا شوق ہے
دیمک ہے ایک قومی قیادت کے درمیاں
پھر پڑ گیا اٹھارہوں ترمیم پر ظفر
اک میچ عدلیہ اور حکومت کے درمیاں

مژدہ

مرحبا کوئی تو پاکستان میں
ارتقا کی سیڑھیوں پر چڑھ گیا
آپ ہم بیکار ہیں تو کیا ہوا
گورگن کا کام خاصا بڑھ گیا

آٹا اور کیک

تم میں رتی بھر بھی عقل اگر ہوتی
گالاں پھر سرکار کو ایویں کیوں دیتے
اِتنی بات پہ اِتنا غصہ چہ معنی
آٹا مہنگا تھا تو کیک اُڑا لیتے

بارِ خدا

تھے ہم بھی نام لیوا اعلٰی قدروں کے
پر اب اُن کی پذیرائی نہیں باقی
ظفر ہر دوسرا بندہ صحافی ہے
قسم کھانے کو سچائی نہیں باقی

مآلِ کار

حقّہ پانی بھرنا ہے یس سر یس سر کرنا ہے
چُپ چپیتے سہنی ہے ماں بہن کی ہر گالی
دلبریٔ امریکہ میں تو ایسا ہونا تھا
منہ تو کالا کرتی ہے کوئلوں کی دلالی

شاوا پاکستان

اپنے جوتے اپنے سر کا عجب نظارا پاکستان
اپنے ہاتھوں بنا ہوا ہے ایک تماشہ پاکستان
نیٹو کی بمباری کا ترجیحی خطہ ۔۔۔۔ پاکستان
نیٹو کو ہتھیاروں کی سپلائی کا ذریعہ پاکستان

بارِ لطافت

گرانی کے اِس دور میں کیا کہیں
اگرچہ محبت تری چاہیئے
ترے ناز ہم سے تو اُٹھتے نہیں
اب اس کے لئے اِک قلی چاہیئے

علامت

امریکہ کی منشا ہے
پاکستان میں مرد نہ ہوں
آپ بھی داڑھی رکھتے ہیں
آپ بھی دہشت گرد نہ ہوں

تاوانِ امن

کتنے معصوموں کا خوں کرنا ہے
کتنے مظلوموں کا نکلے گا دم
اپنے مطلب کا اگر کرنا ہے
امن ہوتا نہیں یونہی قائم

جنسِ تجارت

غیرت کبھی ڈالر سے خریدی نہیں جاتی
آزادیاں شرمندۂ قیمت نہیں ہوتیں
دیکھا نہیں کرتے یونہی تاجر کی نظر سے
قومیں تو کبھی جنسِ تجارت نہیں ہوتیں

نائن الیون

اک خوگرِ انصاف کا انصاف بھی دیکھا
جب مجھ کو ہی ہر وار لگا میرے وطن میں
چہ خُوب وقوعہ ہوا امریکہ میں لیکن
تفتیش کا بازار لگا میرے وطن میں

اونٹ رے اونٹ

کجکلاہانِ سیاست کا چلن کیا کہنا
راستہ راست ہے نہ فردِ عمل سیدھی ہے
اب تو اخبار جو دیکھوں تو یہ نکلے منہ سے
اونٹ رے اونٹ تری کون سی کل سیدھی ہے

Crusade

مسلمانو ! بہت سادہ ہو تم بھی
گمان امن کس اعلام کا ہے
صلیبی جنگ بازوں کی لغت میں
اسامہ کوڈ نیم اسلام کا ہے

صلیبی امریکہ

ہر مسلماں کے لئے بے جرم بھی تعزیر ہے
ہر عدالت میں صلیبی معتصب ٹکرائے گا
عدلِ واشنگٹن تو وابستہ ہے پھندے سے ظفر
جس گلے کے ناپ کا ہوگا اُسے پڑ جائے گا

آئیڈیل

افسانوی محبتیں افسانہ کر گئیں
خاتون کا نصیب تو چکر میں پڑ گیا
آئیڈیل کا بھوت کسی کا نہ ہونے دے
اختر میں گھس گیا کبھی انور میں پڑ گیا

امریکہ کا انصاف

کیوں اسامہ کا بھی نزلہ نہ گرائے اس پر
ہاتھ آ جائے اگر عافیہ جیسی بےکس
یہی امریکہ بہادر کا ہے انصاف ظفر
جس پہ چل جائے گا بس اُس پہ چڑھادے گا بس

فاتحانہ شکست

لوگ کرکٹ کے باب میں اب کے
جاوداں بندوبست چاہتے ہیں
ہارنے کا قلق نہیں ہے ظفر
فاتحانہ شکست چاہتے ہیں

رشوت

کسی سرکاری ایوان میں
کوئی فائل بھی پھنسنے نہ دی
جس کو کہتے ہیں رشوت ظفر
ماسٹر کی ہے ہر قفل کی

فرق

قومی کھلاڑیوں سے یہ التجا ہے میری
قوم و وطن کی حُرمت میدان میں نہ ہارو
دونوں مقابلے کے ہیں امتحان لیکن
کرکٹ میں اور جوئے میں کچھ فرق تو ہے یارو

بجلی کا بل

فلک بوس ہونے لگیں قیمتیں
گرانی کا بھونچال دہلا گیا
ظفر اب تو بجلی میں اتنا نہیں
جو بجلی کے بل میں کرنٹ آگیا

عشق کی میچورٹی

شام اک ہوٹل میں دیکھی عشق کی میچورٹی
چائے پر آئے تھے لیلٰی مجنوں ڈیٹنگ کے لئے
اور جب کہہ سُن لیا، امریکی سسٹم کے تحت
اپنے اپنے حصے کی پیمنٹ کی اور چل دئے

شرارتوں کے انداز

یوں کوئی دے رہا ہے رہ رہ کر
اپنی آمد کے سلسلے کی ڈیٹ
جیسے دیتی ہے گورنمنٹ ہم کو
لوڈ شیڈنگ کے خاتمے کی ڈیٹ

عوام الناس

سارے صیاد کامراں ٹھہرے
خوگرِ جال ہیں عوام الناس
اب سیاست کے رہزنوں میں ظفر
لوٹ کا مال ہیں عوام الناس

مضبوط حکومت

ایسا چوں چوں کا مربہ نہیں دیکھا میں نے
کوئی عفریت نوالے کو نگل نہ پایا
ایسی مضبوط حکومت ہے کہ توبہ توبہ
عید کا چاند بھی جمعہ کو نکل نہ پایا

علی بابا

سیاست کی چرخی بھی چلتی رہی

وزیروں مشیروں کے دوروں کے ساتھ

دکھاتے رہے ہاتھ سیلاب میں

علی بابا چالیس چوروں کے ساتھ

کارِ بیکاری

کام جیسے اور اپنا کوئی دنیا میں نہیں

کاوشِ دنیا و دیں سے مل چکی یکسر نجات

ہوبہو مِرگی کی صورت بن گئی ہے شاعری

فاعلاتن فاعلاتن فاعلاتن فاعلات

دھڑکا

ڈھل چکا عشق عقد میں جن کا

وہ دوبارہ کُھرک سے ڈرتے ہیں

ایسے تائب ہوئے ہیں وہ عاشق

چوڑیوں کی کھنک سے ڈرتے ہیں

اپنی اپنی تاڑ

سارے راجہ اِندر ہیں اس پُرجا میں

اپنے اپنے حصے کی ملکہ کے سوا

جتنے سُندر چہرے ہیں دنیا میں ظفر

خالُو سب کے تاڑُو ہیں خالہ کے سوا

یکسانیت

ہیں تو دو دنیاؤں کی مخلوق ظفر

کام ہے اِن کا یکساں بھی اور وکھرا بھی

قوم و وطن کا قیمہ قیمہ کرتے ہیں

خودکش حملہ آور بھی اور وزرا بھی

جادوگر

ایسا کوئی جادوگر بھی کر نہیں سکتا

جو جاُدو گاڑی کے مچھندر کر سکتے ہیں

جس ویگن میں تل دھرنے کی جگہ نہیں ہے

اُس میں اور بھی بندے اندر کر سکتا ہے

ہمارے لیڈر

قومی ریزرو ڈینجر لیول پہ ہیں تو کیا ہے

اپنی تجوریوں کی توندیں تو بھر چلے ہیں

یہ اپنے لیڈروں کو معلوم ہی نہیں ہے

کس رُوٹ کے ڈرائیور ہیں اور کدھر چلے ہیں

علامات

اچانک خوردنی اجناس کو سُوجھے خلابازی

یکایک رنگ اُڑ جائے خریداران بے بس کا

تحیر میں نہ پڑنا جان لینا کہ کہیں پھر سے

مسلماں خیر مقدم کرتے ہیں ماہ مقدس کا

گھاس اور گدھا

موقع سے فیض اُٹھانا اُن کی ہابی ہے

جب گھاس میسر ہو جائے تو کیوں نہ چریں

آؤ کہ گاڑیں تنبو روڈ کے نُکرے پر

سیلاب زدوں کے نام پہ اپنی توند بھریں

جمعہ کی عید

خدا معلوم کیوں سرکار دو خطبوں سے ڈرتی ہے

اگر ہو عید جمعہ کو تو خطرہ اس میں کیسا ہے

یہی ہے ان کی منشا کہ جھلک دکھلانے سے پہلے

یہ ہم سے چاند خود پوچھے بتا تیری رضا کیا ہے

جنگل کا قانون

آج بنام ِامن جو دہشت گردی ہے دنیا میں

اس سے دنیا والوں نے یہ بات سمجھ لی ہو گی

جنگل کا قانون ہے اب بھی دنیا بھر میں لاگو

جس کے ہاتھ میں لاٹھی ہو گی بھینس اُسی کی ہو گی

لائقِ انصاف

بیروت ہو بغداد ہو وانا ہو کہ کابل

یُو این او کے در پر ہیں عبث شائقِ انصاف

دنیا کے وڈیروں کا عقیدہ ہے ازل سے

مظلوم مسلمان نہیں لائقِ انصاف

مشورہ

پسینے کا چکا دیں محنتانہ

لہو کے قرض پلے پڑ نہ جائیں

جو حق مزدور کا ہے اُن کو دے دیں

کہیں لینے کے دینے پڑ نہ جائیں

خدا جانے

خدا جانے کہ سارے مالکوں کو

دکھائی دیتے ہیں کیوں شُوم مزدور

لگا دیتے ہیں اس مد میں کروڑوں

کہ لاکھوں سے رہیں محروم مزدور

ترقی

اپنے وطن کی ہم کبھی تعریف کرتے ہی نہیں

حُبِ وطن کے باب میں سب کا بلڈ ہے کولڈر

جا کر اسمبلی میں کوئی دیکھےترقی کا گراف

پہلے انگوٹھا چھاپ تھے اب جعلی ڈگری ہولڈر

مسلمان اور رمضان

ہم مسلمان تو ہر بار ظفر

سخت رمضان کی آمد کر دیں

کھانے پینے کی سبھی چیزوں کی

قیمتیں ڈیڑھ سو فیصد کر دیں

چودہ اگست ۔ ایک سوال

کیا سوچ کے ہم جشن آزادی مناتے ہیں

جس دور میں خودداری کج رائی ہے خامی ہے

پوچھے تو کوئی جا کے یہ قوم کے لیڈر سے

آزادی کا مطلب کیا امریکی غلامی ہے

سچی سرکار

ٹھیک ہے سرکار کا اعلامیہ

میڈیا کے دعوے تو سچے نہیں

وہ جو زرداری پہ برسے تھے ظفر

قوم کے جذبات تھے جوتے نہیں

بارِ خدا

تھے ہم بھی نام لیوا اعلیٰ قدروں کے
پر اب اُن کی پذیرائی نہیں باقی
ظفر ہر دوسرا بندہ صحافی ہے
قسم کھانے کو سچائی نہیں باقی

آج کا اخبار

یہ قتل یہ فساد یہ ڈاکے یہ حادثے

اخبار دیکھ کر مجھے چکر سا آ گیا

کیا واقعی یہ آج کا اخبار ہے ظفر

یا تو کسی وکیل کی فائل تھما گیا