جنگل کا قانون

آج بنام ِامن جو دہشت گردی ہے دنیا میں

اس سے دنیا والوں نے یہ بات سمجھ لی ہو گی

جنگل کا قانون ہے اب بھی دنیا بھر میں لاگو

جس کے ہاتھ میں لاٹھی ہو گی بھینس اُسی کی ہو گی

لائقِ انصاف

بیروت ہو بغداد ہو وانا ہو کہ کابل

یُو این او کے در پر ہیں عبث شائقِ انصاف

دنیا کے وڈیروں کا عقیدہ ہے ازل سے

مظلوم مسلمان نہیں لائقِ انصاف

مشورہ

پسینے کا چکا دیں محنتانہ

لہو کے قرض پلے پڑ نہ جائیں

جو حق مزدور کا ہے اُن کو دے دیں

کہیں لینے کے دینے پڑ نہ جائیں

خدا جانے

خدا جانے کہ سارے مالکوں کو

دکھائی دیتے ہیں کیوں شُوم مزدور

لگا دیتے ہیں اس مد میں کروڑوں

کہ لاکھوں سے رہیں محروم مزدور

ترقی

اپنے وطن کی ہم کبھی تعریف کرتے ہی نہیں

حُبِ وطن کے باب میں سب کا بلڈ ہے کولڈر

جا کر اسمبلی میں کوئی دیکھےترقی کا گراف

پہلے انگوٹھا چھاپ تھے اب جعلی ڈگری ہولڈر

مسلمان اور رمضان

ہم مسلمان تو ہر بار ظفر

سخت رمضان کی آمد کر دیں

کھانے پینے کی سبھی چیزوں کی

قیمتیں ڈیڑھ سو فیصد کر دیں

چودہ اگست ۔ ایک سوال

کیا سوچ کے ہم جشن آزادی مناتے ہیں

جس دور میں خودداری کج رائی ہے خامی ہے

پوچھے تو کوئی جا کے یہ قوم کے لیڈر سے

آزادی کا مطلب کیا امریکی غلامی ہے

سچی سرکار

ٹھیک ہے سرکار کا اعلامیہ

میڈیا کے دعوے تو سچے نہیں

وہ جو زرداری پہ برسے تھے ظفر

قوم کے جذبات تھے جوتے نہیں

بارِ خدا

تھے ہم بھی نام لیوا اعلیٰ قدروں کے
پر اب اُن کی پذیرائی نہیں باقی
ظفر ہر دوسرا بندہ صحافی ہے
قسم کھانے کو سچائی نہیں باقی

آج کا اخبار

یہ قتل یہ فساد یہ ڈاکے یہ حادثے

اخبار دیکھ کر مجھے چکر سا آ گیا

کیا واقعی یہ آج کا اخبار ہے ظفر

یا تو کسی وکیل کی فائل تھما گیا

اِس حمام میں

طمع کس کی ہے جو خفتہ ہے اب تک

نظر کس کی ہے جو کانی نہیں ہے

کرپشن سب کی ظاہر ہو چکی ہے

یہ ٹوپی اب سلیمانی نہیں ہے

تم

تیرے وعدوں پر یقیں آتا ہے کم

جھوٹ کا طومار لگتے ہو مجھے

ہانکتے ہو اِس قدر بے پر کی تم

شام کا اخبار لگتے ہو مجھے

زرداری اور جوتیاں

حضرتِ بش کی ہمسری پائے
ہر کسی کا یہ مرتبہ نہ ہوا
سچ تو یہ ہے کہ صدر زرداری
جوتیاں کھا کے بے مزا نہ ہوا

احساس مر نہ جائے تو ۔۔۔

کرتے رہے جو صرفِ نظر اپنی قوم سے
اُن لیڈروں کی دہر میں سبکی بڑی ہوئی
احساس مر نہ جائے تو زرداری کے لئے
کافی ہیں سر پہ جوتیاں دو ہی پڑی ہوئی

ایک دعا

حماقت پہ قائم رہیں لوگ دائم
پھلے اور پھولے سیاست کا پیشہ
وطن والے سارے جہنم میں جائیں
میاں اور زرداری کھپیں ہمیشہ

سرزنش

شریفوں کے نہیں ہوتے ہیں یہ لچھن
کہے دیتا ہوں تجھ سے گالیاں نہ دے
میں تیرے کان جڑ سے کھینچ ڈالوں گا
ابے الّو کے پٹھے گالیاں نہ دے

قومی کرکٹ ٹیم

جب ظفر یاب تھے کیا کیا تھے ہمارے ہیرو
اب جو ناکام ہوئے ہیں تو لگے کیا مس فٹ
کیوں نہ ہر میچ میں ٹھینگوں کے انعامات ملیں
گلی ڈنڈے کی طرح کھیل رہے ہیں کرکٹ

اور زیادہ

بھاڑ میں جائے ملک کی غربت
اور تولید کی بڑھے رفتار
تم سلامت رہو ہزار برس
ہر برس بیٹے ہوں پچاس ہزار

اے وطن

عزیز از جان ہیں تیری فضائیں
یہ پیرس یہ یہ جنیوا کچھ نہیں ہے

مگر اسلام جو نہ راس آئے
جواز اے دیس تیرا کچھ نہیں ہے

مسائلستان

معاشی مسئلہ ہو یا سیاسی

بلائے جان بنتا جا رہا ہے

یہ پاکستان یہ اپنا وطن بھی

مسائلستان بنتا جا رہا ہے

تلخ حقیقت

قوم نے ہر آمر کو بھگایا
اور جمہوری بھوت لئے ہیں
روٹی کپڑا مکاں والوں نے
گولی کفن تابوت دئے ہیں

****ارے نوج****

یہ کن کو چُن بیٹھے ہیں
پگلا تُو اور کملی میں
جن کو جیل میں ہونا تھا
بیٹھے ہیں اسمبلی میں