سیاسی ڈپلومیسی

لُوٹ لیجے ڈپلومیسی کے مزے
عالمِ بے خانماں برباد میں
گالیاں دے لیجئے دل کھول کر
معذرت کر لیجئے گا بعد میں

عدلیہ سے

چھپکلی پر ہاتھ ڈالا ہے بڑا اچھا کیا
دیکھنا ہے کیا مگرمچھ کو پکڑ پائیں گے آپ
چور کو پکڑا ہے لیکن بات تب بن پائے گی
چور کی ماں کو بھی کوئی ہاتھ دکھلائیں گے آپ

قومی کرکٹ ٹیم سے

رہے یاد کرکٹ کے میدان میں
حدیں انبساط و طمع کی ہیں طے
یہ نقطۂ باریک مت بھولنا
جوئے اور کرکٹ میں کچھ فرق ہے

بیچارہ امریکہ

ساری دنیا میں ہو رہی ہے ظفر
کس لئے ہائے ہائے امریکہ
ایٹمی اسلحہ بناتا ہے
تاکہ مکھیاں اُڑائے امریکہ

کیوں نہیں

جب یہ ملک و قوم اُن کے باپ کی جاگیر ہے
ایک اُن کے ہاتھ سے بجتی ہے تالی کیوں نہیں
حکمرانوں میں چمونے ہیں اسی احساس کے
عدلیہ اب تک ہمارے گھر کی لونڈی کیوں نہیں

نیب کا چئرمین

کالے کرتوتوں پر رہے پردہ
حکمرانوں کا پورا سپنا ہو
سارے کیسوں سے جان چھٹ جائے
نیب کا چئرمین اپنا ہو

مفت کا پنگا

بدبختی ہے یا مفت کے پنگوں کا شوق ہے
دیمک ہے ایک قومی قیادت کے درمیاں
پھر پڑ گیا اٹھارہوں ترمیم پر ظفر
اک میچ عدلیہ اور حکومت کے درمیاں

مژدہ

مرحبا کوئی تو پاکستان میں
ارتقا کی سیڑھیوں پر چڑھ گیا
آپ ہم بیکار ہیں تو کیا ہوا
گورگن کا کام خاصا بڑھ گیا

آٹا اور کیک

تم میں رتی بھر بھی عقل اگر ہوتی
گالاں پھر سرکار کو ایویں کیوں دیتے
اِتنی بات پہ اِتنا غصہ چہ معنی
آٹا مہنگا تھا تو کیک اُڑا لیتے

بارِ خدا

تھے ہم بھی نام لیوا اعلٰی قدروں کے
پر اب اُن کی پذیرائی نہیں باقی
ظفر ہر دوسرا بندہ صحافی ہے
قسم کھانے کو سچائی نہیں باقی

مآلِ کار

حقّہ پانی بھرنا ہے یس سر یس سر کرنا ہے
چُپ چپیتے سہنی ہے ماں بہن کی ہر گالی
دلبریٔ امریکہ میں تو ایسا ہونا تھا
منہ تو کالا کرتی ہے کوئلوں کی دلالی

شاوا پاکستان

اپنے جوتے اپنے سر کا عجب نظارا پاکستان
اپنے ہاتھوں بنا ہوا ہے ایک تماشہ پاکستان
نیٹو کی بمباری کا ترجیحی خطہ ۔۔۔۔ پاکستان
نیٹو کو ہتھیاروں کی سپلائی کا ذریعہ پاکستان

بارِ لطافت

گرانی کے اِس دور میں کیا کہیں
اگرچہ محبت تری چاہیئے
ترے ناز ہم سے تو اُٹھتے نہیں
اب اس کے لئے اِک قلی چاہیئے

علامت

امریکہ کی منشا ہے
پاکستان میں مرد نہ ہوں
آپ بھی داڑھی رکھتے ہیں
آپ بھی دہشت گرد نہ ہوں

تاوانِ امن

کتنے معصوموں کا خوں کرنا ہے
کتنے مظلوموں کا نکلے گا دم
اپنے مطلب کا اگر کرنا ہے
امن ہوتا نہیں یونہی قائم

جنسِ تجارت

غیرت کبھی ڈالر سے خریدی نہیں جاتی
آزادیاں شرمندۂ قیمت نہیں ہوتیں
دیکھا نہیں کرتے یونہی تاجر کی نظر سے
قومیں تو کبھی جنسِ تجارت نہیں ہوتیں

نائن الیون

اک خوگرِ انصاف کا انصاف بھی دیکھا
جب مجھ کو ہی ہر وار لگا میرے وطن میں
چہ خُوب وقوعہ ہوا امریکہ میں لیکن
تفتیش کا بازار لگا میرے وطن میں