پہلا روزہ

چھیڑتے ہیں ہمیں سب کہہ کے دُخانی انجن

بسکہ جاں دادہء تمباکو ہے یہ دل خاصا

ہم کو گچی سے پکڑ لیتی ہے سگریٹ نوشی

پہلا روزہ ہے ہمارے لئے مشکل خاصا

لطف سزا

قوم کے پاؤں میں ہیں مجبوریوں کی بیڑیاں
جرم جب کوئی نہ ہو لطف سزا ہی اور ہے

چین ہے دن کا نہ شب کی نیند باقی ہے ظفر
گرمیوں میں لوڈ شیڈنگ کا مزا ہی اور ہے

انقلاب

ایسا کوئی بھی مظہر دیس میں نہ رہ پائے

جو ہمارے جیون میں زہرِ بے بسی لائے

ہاں مگر ہم اپنا تو رسک لے نہیں سکتے

انقلاب لائے تو دوسرا کوئی لائے

ہمارے ہوٹل

یہ فضیلت ہے ہمارے ہی وطن کو حاصل

اور ملکوں میں کہاں اس کا چلن ہوتا ہے

بھول کر بھی اُسے ہوٹل نہیں کہتے ہیں ہم

کاکروچوں سے تہی جس کا کچن ہوتا ہے

انتظار کا عالم

رہ رہ کے اُٹھ رہی ہے اُسی کی طرف نظر

گھڑیال میرے صبر کو کرنے لگا ہے چٹ

گھنٹہ بھی لوڈ شیڈنگ کا گھنٹوں سا بن گیا

ہر دس منٹ کے بعد گزرتے ہیں دو منٹ

لوڈ شیڈنگ کی برکت

لوڈ شیڈنگ رہتی ہے میرے دیس میں شب بھر

بس اِسی سبب سے کچھ باہنر بنا ہوں میں

رات بھر اِسی کی تو مشق کرتا رہتا ہوں

مچھروں سے لڑ لڑ کر ریسلر بنا ہوں میں

استغفر اللہ

یہ ہے سیاستدانوں کی کچھ

عقلِ رسا سے اوپر کی شے

عزت ہے کس کھیت کی مولی

غیرت کس ہوٹل کی ڈش ہے

نیا رخ

لوڈ شیڈنگ پہ تنقید اپنی جگہ

کام لیکن یہ اچھا بھی ہے دوستو

لوڈ شیڈنگ نہ ہوتی تو بجلی کا بل

کتنا ہوتا یہ سوچا بھی ہے دوستو

پنڈورا کا پٹارا

کیسی اندھیر نگری برپا ہوس نے کر دی
انصاف کے لئے اِک رولا ہوا ہے یارو

اُن کے گلے میں پٹے ڈالے گا کون پھر سے
این آر او نے جن کو کھولا ہوا ہے یارو

Pick n Drop

جب بھی جمہوریت کے نام لگا
کارہائے فلاپ کا ذمہ
مارشل لا نے لے لیا بڑھ کر
اس کے پک اینڈ ڈراپ کا ذمہ

اپنا کیا دھرا

دئے ہیں الیکشن میں ووٹ اُن کو ہم نے
دھرا ہم نے ہی اُن کی گردن میں سریا

کرپشن سے اُن کو کوئی کیسے روکے
سیاست ہے جن کی کمائی کا ذریعہ

سرکاری موقف

فلاح عوامی پہ اصرار کر کے
دکھاتے ہیں ٹٹ پونجئے اپنی فطرت
سمجھتے نہیں کار جمہوریت کو
اُنہیں کے لئے ہو رہی ہے سیاست

شرط یہ ہے

یہ ہمارے مقننہ سارے
عالموں فاضلوں سے بھر جائیں

شرط یہ ہے کہ عدلیہ والے
ڈگریوں کی پرکھ نہ کروائیں

قربانی

سعادت ہے کہ اس مہنگائی میں بھی
خدا نے جرأتِ ایمانی دی ہے
مگر میں نے کیا قربان بکرا
یا بکرے نے مری قربانی دی ہے

سہولت

نہ پانی ہے نہ دانہ ہے ، گرانی کا زمانہ ہے
بھلا اِس دور میں ہمت کسے مہماں نوازی کی
تصور میں چلے آؤ ، نہ ہو تکلیف دونوں کو
تمہیں ویگن میں رُلنے کی مجھے مہماں نوازی کی

ڈرون حملے

مخنثانہ مساعی ہیں حکمرانوں کی
جواب رکھتے نہیں ہیں ڈرون حملوں کا
ستم ظریف ہے لاحول سے نہیں ٹلتا
جنابِ سام کو ٹھہرا جنون حملوں کا

حفظِ ماتقدم

داخلہ ایڈوانس کروا لیں
آج کر لیں جو کل کو فیٹ میں ہے
فکرِ تعلیم میں نہ رسوا ہو
بچہ / بچی جو ماں کے پیٹ میں ہے

بشرطیکہ

تر نوالہ دکھائی دیتے ہیں
تا کوئی لے کے پین چھڑ جائے
ہم تو کرکٹ بھی جیت سکتے ہیں
جب کوئی بیٹسمین چھڑ جائے

ایسی کی تیسی

ظفر انصاف پرور ہے تو کیا ہے
ترے اوصاف کی ایسی کی تیسی
مری گچی پکڑنا چاہتا ہے
تو پھر انصاف کی ایسی کی تیسی

سیاسی ڈپلومیسی

لُوٹ لیجے ڈپلومیسی کے مزے
عالمِ بے خانماں برباد میں
گالیاں دے لیجئے دل کھول کر
معذرت کر لیجئے گا بعد میں